30-майда И.Абдраимов атындагы Кыргыз авиациялык институтунда уникалдуу жолугушуу болуп өттү. Студенттер бир моторлуу учак менен Жер шарын айланып чыккан Борбордук Азия жана түрк тилдүү өлкөлөрдүн жалгыз өкүлү Союзбек Салиев, ошондой эле АКШдан келген учкучтар Артур «Арт» Мортведт (Artur «Art» Mortvedt) жана Линда Солларс (Linda Sollars) менен баарлашуу мүмкүнчүлүгүнө ээ болушту.
Жолугушуу учурунда учкучтар учуудан алган таасирлери менен бөлүшүп, жолдо туш болгон кыйынчылыктар, мындай масштабдуу учууну даярдоонун жана уюштуруунун техникалык аспектилери жөнүндө айтып беришти. Алар авиациялык окуу жайдан алган билимдердин маанилүүлүгүнө өзгөчө көңүл буруп, теориялык база жана талыкпаган практика абадагы ар кандай кыйынчылыктарды жеңүүгө жардам берээрин белгилешти.
Студенттер меймандардын аңгемелерин кызыгуу менен угуп, кызыктырган суроолорун беришти.
Жолугушуунун соңунда учкучтар институтка жылуу кабыл алгандыгы үчүн ыраазычылык билдирип, студенттерге окууларына ийгилик жана жаңы бийиктиктерди багынтуусун каалашты.
